Aruba ta prepara maneho nacional di turismo y presupuesto ATA pa 2027

ORANJESTAD - Gobierno y Aruba Tourism Authority ta avansa cu preparacion di un maneho nacional pa turismo, cu mester defini e rumbo strategico di uno di e pilarnan principal di economia di Aruba. Minister Wendrick Cicilia, CEO di ATA Ronella Croes y Hunta di Supervision di ATA a trata entre otro e Plan Corporativo y presupuesto di ATA pa 2027, como tambe proyectonan futuro den sector.

E proceso pa e maneho nacional di turismo ya a pasa door di dos sesion cu stakeholdernan. Durante esakinan a evalua e rumbo di turismo, diferente factor cu ta influencia e sector y ampliacion di prioridadnan strategico.

Un tercer sesion ta wordo prepara cu mas enfasis riba implementacion di e vision y proyectonan concreto. Meta ta pa fortalece turismo y economia di Aruba, aumenta resistencia contra periodonan dificil y crea mas oportunidad pa participacion local den e beneficionan economico cu turismo ta genera.