9 aña despues, Gobierno ta bolbe priminti renobacion di ex-pompstation

ORANJESTAD – Gobierno diahuebs a presenta renobacion di e ex-pompstation di Lagoen den centro di Oranjestad como parti di e revitalisacion di capital. Pero si e noticia ta parce algo conoci, ta pasobra en berdad e archivo di casi nuebe aña pasa ta mustra cu e mesun edificio, ironicamente bou di e mesun liderazgo politico, ya tabata presenta como un proyecto di renobacion y revitalisacion. E comparacion ta lanta un pregunta inevitable: kico ta haci e proyecto di 2026 diferente for di e promesa cu tabata riba mesa den 2017? E diferencia ta cu e biaha aki, e proyecto ta di minister di Futuro, Geoffrey Wever, aunke cu e ministernan di AVP, Rene Herde y Mike Eman a rapidamente coy delantera den esaki. 

HERDE

Awe, Minister di Infrastructura Rene Herde ta indica cu renobacion di e ex-pompstation ta forma parti di un vision mas amplio pa revitalisa Oranjestad y crea condicionnan pa desaroyo economico y inversion. Pero e edificio no ta aparece pa prome biaha den un plan di revitalisacion.

Un articulo publica dia 8 di juni 2017 tabatin como titular: “Empresario local hoben ta contribui na revitalisacion di centro di Oranjestad.” Ariba e titular tabata para ainda: “Edificio unda antes tabata stacion di gasolin di ‘Lagoen’ ta wordo renoba!”

Segun e articulo di e tempo ey, empresario local Erasmus di Muscles & Lungs Crossfit tabata huur e edificio cu plan pa establece un gimnasio y cafe saludable. E publicacion tabata relata cu intencion di Gobierno tabata pa reconstrui e edificio, usa un parti como sede pa un “city inspector” y huur otro parti pa crea actividad economico den centro di Oranjestad. E proyecto tabata presenta como un contribucion concreto na revitalisacion di centro.

E articulo a inclui declaracionnan di Premier Mike Eman y awor ex minister Minister Benny Sevinger. Esta, na 2017 no tabata papia simplemente di un idea futuro. E mensahe publico tabata cu e edificio ta wordo renoba.

ATROBE

Awor, na 2026, Gobierno ta bolbe pone e ex-pompstation den un plan di revitalisacion. E diferencia ta cu casi nuebe aña a pasa a pasa. Y esaki ta laga un cantidad di preguntanan cu Gobierno ainda mester aclara: kico exactamente a pasa cu e proyecto di 2017? E acuerdo cu e empresario local a wordo ehecuta? E edificio a wordo renoba conforme cu e plan presenta e tempo ey? Cuanto placa publico, si acaso, a wordo inverti den e proyecto durante e añanan? Pakico e plan no a resulta den un uso permanente di e edificio? Y, principalmente, kico ta diferente awor?

E comparacion ta bira ainda mas relevante pasobra Mike Eman, kende tabata premier durante e anuncio di 2017, ta nuevamente premier di Aruba. Naturalmente, un gobierno por reactiva un proyecto cu a stanca. Circunstancianan por cambia, proyectonan por cay afo y prioridadnan por wordo revisa. Pero ora Gobierno bolbe presenta e mesun edificio como parti di e mesun meta general — revitalisacion di Oranjestad — e historia anterior no por wordo ignora.

POR CONFIA CU AWOR SI TA BAY RENOB’E?

E pregunta no ta si Gobierno tin derecho di intenta atrobe. E pregunta ta pakico pueblo mester confia cu e biaha aki ejecucion lo sigui e anuncio.

SKEPTICO

Riba social media y den combersacion publico, reaccionnan ta refleha skepticism: ta un proyecto real cu awor lo avansa, of ta otro anuncio politico cu lo desaparece ora atencion publico move pa otro tema? E duda no ta extraño. Un ciudadano cu mira solamente e anuncio di awe por pensa cu ta trata di un iniciativa completamente nobo. Pero un ciudadano cu consulta archivo por mira cu casi nuebe aña pasa e edificio ya tabata wordo presenta como uno cu tabata den proceso di renobacion. Y internet ta conserva e contraste.

ELIMINA E STUNT

E manera mas facil pa Gobierno elimina impresion di un “stunt” no ta cu mas promocion, sino cu informacion concreto. Cua ta e presupuesto actual? Cua ta e alcance exacto di e proyecto? Tin diseño aproba? Tin procedimiento di destaho? Tin fecha pa cuminsa construccion? Tin fecha proyecta pa entrega? Y cua lo ta e funcion final di e edificio? Pero e pregunta principal ta permanece: kico a pasa entre e anuncio di 2017 y e anuncio di 2026?

Si Gobierno por presenta un cronologia cla y demonstra cu e proyecto actual tin financiamiento, responsabilidad y fecha concreto, e comparacion cu 2017 por perde fuerza. Si no, e archivo lo sigui papia pa su mes.

Gobierno por presenta un anuncio como nobo. Pero internet no ta lubida cu e mesun edificio ya tabata “wordo renoba” casi nuebe aña pasa.