Analisis: Arubahuis: rebranding no mester reemplasa un simbolo di Aruba na Hulanda

Skirbi pa Tito Laclé

 Durante decenianan, ora un Arubiano papia di “Arubahuis”, practicamente tur hende sa di kico ta trata: e representacion di Aruba na Hulanda. Awor cu e institucion ta presenta su mes cada biaha mas bou di e nomber formal Kabinet van de Gevolmachtigde Minister van Aruba, of Gabinete di Aruba, y su presencia digital ta usa “Kabinet Aruba”, mi a dicidi di puntra pakico no ta referi mas na Arubahuis sino Gabinete di Aruba. E contesta tabata interesante: Tin indicacion cu a ‘rebrand’ (reposiciona) e concepto di e establecimento. Y e ora mi pregunta ta bira: Kico Aruba ta gana cu modernisa e nomber, y kico nos por perde si e nomber “Arubahuis” desaparece?

E pregunta no ta solamente uno di marketing. Pa mi, e  ta toca historia, identidad nacional y e manera cu Aruba ta presenta su mes den Reino Hulandes.

UN NOMBER CU TA CARGA HISTORIA

E actual Kabinet van de Gevolmachtigde Minister tin su origen den representacion cu Aruba a establece na Hulanda prome cu Status Aparte. Segun informacion oficial di e propio institucion, e representacion a habri na 1983 como representante di e tempo ey eilandgebied Aruba na Hulanda. Ora Aruba a obtene su Status Aparte dia 1 di januari 1986, e oficina a bira formalmente Kabinet van de Gevolmachtigde Minister van Aruba (Gabinete di e Minister Plenipotenciario di Aruba), cu mester admiti ta un nomber largo y dificil pa uza den combersacion den pueblo.

Otro fuente historico ta pone e apertura formal incluso na 25 di maart 1982 y ta conecta e establecimento directamente cu e proceso politico rumbo pa mas autonomia di Aruba. E diferencia di fecha probablemente ta depende di si ta conta e apertura formal of e organisacion den su forma institucional, pero e punto principal ta cla: Arubahuis a nace den e periodo crucial cu a conduci Aruba pa Status Aparte. E palabra “huis” (cas) den e nomber ta zona caluroso, sigur y habri pa tur hende di Aruba. Tambe un “cas” ta un luga unda hopi hende - famia, amigo y conocinan - ta reuni hunto pa combersa, dialoga, descuti y tuma decisionnan bou di un dak. E ta un luga di representacion bo por bisa. Esaki ta duna e palabra “Arubahuis” un peso cu un nomber corporativo nobo dificilmente por crea di un dia pa otro.

KICO ARUBAHUIS REALMENTE TA HACI?

E institucion no ta solamente un oficina pa studiante of un punto di contacto pa Arubiano na Hulanda. Oficialmente, Arubahuis ta representa Gobierno di Aruba na Hulanda conforme cu Statuut pa Reino. E Minister Plenipotenciario tin un direccion general. Su responsabilidadnan ta inclui representa y defende interes di Aruba na Hulanda y cerca Union Europeo, duna sosten y asistencia na Arubianonan na Hulanda, y asisti e minister, parlamentarionan y funcionarionan di Aruba ora nan tin actividad na Hulanda of otro parti di Europa. Ademas, Arubahuis ta funciona como punto di contacto pa Staten di Aruba, Conseho di Minister y departamentonan gubernamental, y tin e tarea importante di colecta informacion, informa y conseha Gobierno di Aruba tocante desaroyonan relevante pa nos pais. Por lo tanto, su funcion ta simultaneamente politico, diplomatico, administrativo y social.

E ARGUMENTO PA CAMBIA BRANDING

Tin un argumento legitimo pa usa “Kabinet van de Gevolmachtigde Minister van Aruba” of simplemente “Kabinet van Aruba”. “Arubahuis” por laga un persona cu no conoce e structura di Reino pensa cu ta trata simplemente di un edificio, centro cultural of oficina di servicio. E nomber formal, contrario, ta comunica inmediatamente cu ta trata di un institucion gubernamental, cu ta duna sosten na un minister di Reino. Specialmente den contacto cu ministerionan Hulandes, Union Europeo, embahadanan, universidadnan, municipio y otro organisacion oficial, un identidad institucional mas consistente por fortalece profesionalismo, y comunica e autoridad pa representa Gobierno di Aruba na Hulanda. E propio Arubahuis ta bisa cu un parti di su vision ta pa aumenta visibilidad di Aruba na Hulanda, den Reino y internacionalmente, y crea cooperacion cu municipio, provincia, universidad, instituto y embahada. Den e contexto ey, modernisacion di branding por tin sentido. Pero tin un diferencia entre modernisa un marca y bandona un marca cu ya tin mas di 40 aña di capital historico.

E problema ta: bo por modernisa te ora bo haci bo rol confuso. Aki ta unda e debate ta bira interesante. “Arubahuis” ta cortico. E ta facil pa corda. E ta unico. Y mas importante: ta Aruba mes den e nomber. “Kabinet van de Gevolmachtigde Minister van Aruba”, aunke ta correcto institucionalmente, ta largo y burocratico. Pero door di yam’e

“Kabinet van Aruba” cu ta mas cortico, ta crea confusion pasobra e “Kabinet van Aruba” oficial ta e Gabinete cu su cede den Cocolishi. “Kabinet van Aruba” ta referi na Gobierno di Aruba mes, of na e Conseho di Minister, y NO na un oficina di representacion na Hulanda. Y aki ta unda mi no ta compronde of ta hay’e confuso. Y cu mi, hopi mas hende sigur. Keremi! 

E nomber “Arubahuis”, di otro banda, practicamente no tin ambiguedad, of crioyamente bisa, falta di claridad.

Incluso ta bon pa sa cu actualmente Rijksoverheid di Hulanda ainda ta registra e institucion prominentemente como “Arubahuis (Kabinet van de Gevolmachtigde Minister van Aruba)” y ta uza “Arubahuis” repetidamente den su descripcion oficial. Y mas interesante ainda: e propio website actual di Kabinet van Aruba ta bisa literalmente cu e Kabinet ta “ook wel bekend als het Arubahuis” — tambe conoci como Arubahuis. Esaki ta indica cu, por lo menos actualmente, Arubahuis no a desparce formalmente for di identidad di e institucion. Pero precisamente aki ta sali e pregunta mas importante. Si e propio institucion, Gobierno Hulandes y mas di 40 aña di historia ainda ta conecta e nomber Arubahuis cu e representacion di Aruba, dicon mester move e nomber ey pa banda? Y mas importante ainda: si meta di e rebranding ta haci Aruba mas visibel na Hulanda, no por ta cu eliminacion di “Arubahuis” ta logra precisamente locual nan no kier?

Den Parti 2 nos ta mira e contradiccion aki, e balor historico di Arubahuis como simbolo di Status Aparte, y si realmente tin un opcion mihor cu simplemente reemplasa e nomber.