Cinco persona deteni despues di persecucion; polis ta confisca droga y auto

ORANJESTAD - Polis a detene cinco persona, entre nan tres menor di edad, despues di un persecucion na Oranjestad diaranson atardi. Durante e accion, polis a confisca droga y e auto den cual e sospechosonan tabata.

Pa mas o menos 6:19 di atardi, Central di Polis a ricibi un yamada cu tabatin un auto cerca di un negoshi na Caya Frere Bernardinus y cu posiblemente un di e ocupantenan tabatin un arma di candela.

Un patruya di Oranjestad a bay na e sitio y a localisa e auto. Ora polis a duna e chauffeur ordo pa para, e no a cumpli y a sigui core, iniciando un persecucion.

Na altura di e veld di River Plate, polis finalmente a logra para e vehiculo. Den e auto tabatin cinco homber: tres menor di edad y dos adulto. Durante un registracion di e vehiculo, polis a haya droga.

Tur cinco a wordo deteni y transporta pa warda di polis, na unda nan lo wordo presenta dilanti di sub fiscal. Tanto e droga como e auto a keda confisca.

Polis despues a sigui busca un arma di candela cu, segun informacion ricibi, lo a wordo benta cerca di e veld di River Plate.

Departamento di Recherche a tuma e caso over y lo sigui cu e investigacion.

Cuerpo Policial Aruba ta pidi cualkier persona cu tin informacion of a mira algo relaciona cu e caso pa yama Tipline di Polis na 11141. Informacion por wordo duna anonimamente.