Investigacion na DIMAS no a haya riesgo pa salud; ventilacion mester mehora

ORANJESTAD - Minister di Husticia Arthur Dowers a ricibi e rapport final di investigacion haci den edificio di DIMAS, despues cu algun siman pasa varios empleado a bira malo durante trabao tras di un holor fuerte di gas y preocupacion tocante posible schimmel.

Pa seguridad, e edificio a wordo evacua y Departamento di Salud Publico, hunto cu PURE Indoor Air Quality Solutions, a haci test di calidad di aire, muestra pa schimmel y inspeccion di sistema central di airco.

Segun e rapport, e resultadonan ta cay dentro di normanan normal y no tin indicacion di un riesgo pa salud di empleadonan of clientenan di DIMAS.

Sinembargo, e investigacion a recomenda pa mehora e ventilacion y circulacion di aire. Dowers a indica cu e recomendacionnan lo haya atencion, specialmente pasobra varios edificio di Gobierno tin sistemanan di airco y ventilacion cu ya tin hopi aña den uso y cu gradualmente mester wordo modernisa.