Opinion: Tarifanan oficial di taxi na Aruba ta lanta pregunta riba proporcionalidad di prijs. Parti 1

Nomber di autor conoci pa redaccion 

Un revision di e tarifanan oficial di taxi na Aruba ta lanta pregunta tocante e proporcionalidad entre distancia recorri y e prijs cu un pasahero ta paga, particularmente den caso di caredanan cortico.

Taxi.aw ta e fuente oficial pa tarifa di taxi na Aruba y, segun e mes website, e tarifanan ta establece y regula pa Gobierno di Aruba. E tarifario actual ta vigente for di 20 di mei 2026 y e calculator online ta considera e fuente mas actual pa determina e prijs di un trip. E tarifa minimo oficial ta US$10, equivalente na Afl. 18.

Un trip di solamente 1.5 kilometer cu ta costa US$25, por ehempel, ta representa un costo efectivo di aproximadamente US$16.67 pa kilometer. Naturalmente, e tarifa di taxi na Aruba no ta calcula literalmente pa kilometer, pero e calculacion ta util pa mustra cuanto e pasahero finalmente ta pagando relaciona cu e distancia recori.

Pa pone e cifra den perspectiva, un servicio especial di transporte na Hulanda di US$287 pa un careda di 118 kilometer ta representa aproximadamente US$2.43 pa kilometer. No ta trata di dos servicio identico y costo operacional entre Aruba y Hulanda tampoco ta mescos, pero e diferencia ta suficientemente grandi pa lanta e pregunta si e sistema di tarifa fiho na Aruba ta produci prijsnan desproporciona den caredanan corto.

Mi a wak tambe otro tarifanan publica oficialmente. Segun informacion di Aruba Tourism Authority basa riba e tarifa oficial di Taxi.aw, un taxi for di aeropuerto pa Oranjestad ta costa US$26, pa e zona di hotelnan low-rise US$37, pa High-Rise South US$40 y pa High-Rise North US$41, sin conta eventual recargonan.

Pa compara e tarifanan cu distancia, fuente di transporte Rome2Rio ta calcula e distancia entre aeropuerto Reina Beatrix y Oranjestad na aproximadamente 5.7 pa 6 kilometer. Un tarifa di US$26 pa aproximadamente 6 kilometer ta resulta den alrededor di US$4.33 pa kilometer.

Pa Eagle Beach, cu ta cai den e zona low-rise, e distancia di trip for di aeropuerto ta aproximadamente 9.2 kilometer segun e mes fuente. Cu un tarifa oficial di US$37, esey ta equivale aproximadamente na US$4.02 pa kilometer.

Pa Palm Beach, distancia di trip ta rond di 9.4 kilometer segun Rome2Rio. Si wordo compara cu un tarifa di US$40 pa High-Rise South, e costo efectivo ta aproximadamente US$4.26 pa kilometer. E calculacion ta indicativo, pasobra e tarifa exacto por varia dependiendo di hotel of punto final den e zona.

E cifranan ta mustra un patron interesante. Den caredanan di alrededor di 6 pa 10 kilometer, e tarifa efectivo por ronda aproximadamente US$4 pa kilometer. Pero ora un trip ta solamente 1.5 kilometer y e prijs ta US$25, e costo efectivo salta pa mas di US$16 pa kilometer. Esaki ta ilustra e efecto cu un sistema di tarifa fijo of por zona por tin riba tripnan cortico. Mayan ta sigui parti 2.