Gobierno no a subsidia e subida e biaha aki: gasolin a subi 25,1 cen

ORANJESTAD - Entrante 12 di augustus 2026, prijs di gasolin na Aruba ta subi cu 25,1 cen pa Afl. 2,909 pa liter, mientras diesel ta subi cu 29,7 cen pa Afl. 2,863 pa liter.

E diferencia importante e biaha aki ta cu Gobierno no ta absorba e subida nobo manera a haci durante e ultimo cuater lunanan. Desde 8 di april te 11 di augustus, Gabinete AVP-Futuro a destina Afl. 10 miyon pa mitiga parti di e aumento internacional di gasolin y diesel. Cu e periodo ey termina, e prijsnan ta bolbe refleha mas directamente e nivel di mercado internacional.

Minister Geoffrey Wever ta atribui e aumento na incertidumbre internacional, specialmente e conflicto entre Merca y Iran y cierre di Estrecho di Hormuz. Segun Gobierno, e prijs internacional usa pa calcula combustible na Aruba a subi considerablemente, tanto pa gasolin como diesel.

Accijns riba gasolin ta bolbe na 61,4 cen pa liter y esun di diesel na 33,2 cen, aunque e reduccion permanente di 10 cen pa liter introduci desde 1 di mei 2025 ta keda vigente.

Gobierno ta indica cu en bes di continua subsidiando e prijs di combustible, e ta enfoca otro sosten riba famianan y trahadornan cu entrada mas abao, incluyendo aumento di bijstand, schooltoeslag y otro medida social.