Arends-Reyes (AVP): Compost Alliance kier transforma desperdicio organico den recurso pa Aruba

ORANJESTAD - Parlamentario Jennifer Arends-Reyes a destaca e potencial di Compost Alliance, un iniciativa di Iberostar cu ta reuni hotelnan y otro partner, incluyendo Aruba Airport Authority, pa transforma resto di cuminda y otro desperdicio organico den compost.

Arends-Reyes, Presidente di Comision di Turismo di Parlamento, a participa hunto cu Minister di Turismo Wendrick Cicilia na un encuentro na Alto Vista Winery pa conoce mas tocante e proyecto.

Segun e parlamentario, e iniciativa ta un ehempel concreto di economia circular: material cu normalmente lo wordo benta afo por wordo procesa y reutilisa pa agricultura, naturalesa y mantencion di area berde.

Arends-Reyes a indica cu, como isla turistico, Aruba ta produci un cantidad considerable di desperdicio diariamente. P’esey, sector publico y priva mester coopera pa reduci desperdicio, aumenta reutilisacion y haci turismo mas sostenibel.

Segun e, proyectonan manera Compost Alliance ta demostra cu crecemento economico y proteccion di medio ambiente por bay man den man.