OM: Quant y Wawoe lo a ofrece un miyon florin pa likidacion na Hato

WILLEMSTAD/AMSTERDAM – Segun Openbaar Ministerie (OM) na Hulanda Shurendy “Tyson” Quant y Urvin “Nuto” Wawoe lo a pone un recompensa di un miyon florin disponible pa mata Erwin “Djais” Juliana, lider di e banda rival Buena Vista City. Esaki ta sali for di informacion publica pa Curaçao.nu.

Juliana y Shentley “Champi” Arnhem a wordo mata durante e tiroteo na aeropuerto Hato riba 15 di juli 2014. Siete otro persona a resulta herida. Segun OM, e atake tabata specificamente dirigi contra Juliana y tabata parti di e conflicto violento entre No Limit Soldiers (NLS) y Buena Vista City.

Durante e prome sesion pro-forma den caso penal contra Quant, OM a bolbe presenta e acusacion cu Quant y Wawoe, como supuesto lidernan di NLS, lo a pone e recompensa di un miyon florin. Fiscal ta basa esaki entre otro riba declaracionnan di testigo y comunicacion codifica cu, segun OM, ta pertenece na Quant.

Sinembargo, e punto principal den e caso ta si OM por demostra un conexion directo entre Quant personalmente y e orden pa e likidacion. Den e caso anterior contra Wawoe, huez a considera cu tabatin indicacion fuerte cu direccion di NLS tabata involucra, pero evidencia no tabata suficiente pa conden'e como autor intelectual di e tiroteo na Hato.

OM ta spera cu mensahenan PGP atribui na Quant por aporta evidencia adicional. Defensa, na su turno, a pidi acceso na e dataset completo di mensahenan pa por verifica nan origen, contexto y manera cu nan a wordo atribui na Quant.

Quant no a duna declaracion tocante e acusacionnan y a haci uso di su derecho di keda keto. E siguiente sesion pro-forma ta programa pa 27 di november.