Contrato di Dick Advocaat cu Corsou a termina, FFK ta evalua su futuro

WILLEMSTAD – Contrato di Dick Advocaat como coach di seleccion nacional di Corsou a termina oficialmente dia 31 di juli. Contratonan di e otro miembronan di staf tecnico y medico tambe a yega na nan final.

Federacion di Futbol di Corsou, FFK, ta enfatisa cu no ta trata di un despedida. E contratonan simplemente a termina conforme e periodo acorda. Sinembargo, FFK tampoco a confirma si Advocaat lo haya un contrato nobo.

Prome cu tuma un decision, e federacion kier haci un evaluacion amplio di e direccion tecnico di futbol di Corsou. Esaki ta inclui preparacion di seleccionnan nacional, desaroyo di hungadornan y coachnan y e estructura tecnico pa futuro.

Segun presidente interino di FFK, Fabi Constansia, directiva lo evalua cua modelo tecnico ta conecta miho cu ambicionnan deportivo di Corsou.

FFK no a indica cuanto tempo e evaluacion lo dura, ni si nan ta negociando cu Advocaat pa un contrato nobo of si otro candidatonan ta wordo considera. E  federacion lo informa publico ora e proceso di decision termina.