NTTO: Aruba ta registra 12.3% mas bishitante di Merca y ta supera hopi otro isla den Caribe

ORANJESTAD – Aruba ta sigui confirma su posicion como un di e destinacionnan turistico mas fuerte den Caribe. Apesar cu varios pais den e region a registra un bahada den biahenan for di Merca durante e prome parti di 2026, Aruba a logra un crecemento di dos cifra den cantidad di bishitantenan Mericano. Segun cifranan publica den un informe basa riba dato di e U.S. National Travel and Tourism Office (NTTO), Aruba a ricibi 4.795 bishitante for di Merca entre januari y april di 2026, compara cu 4.270 den e mesun periodo di 2025. Esaki ta representa un aumento di 12.3%. E informe ta indica cu Aruba ta sobresali gracias na su demanda pa turismo di calidad, excelente conectividad aereo cu diferente ciudadnan Mericano y e reputacion fuerte cu e isla a construye den mercado di Merca.

TURISMO TA SIGUI FUERTE

Mientras cu diferente destinacionnan tradicional den Caribe ta enfrenta menos demanda pa biaha, Aruba a logra mantene un tendencia positivo. Segun e analisis, e isla ta beneficia di bishitantenan cu ta sigui busca un experiencia premium, beach di calidad y un destino sigur y confiabel.

E informe ta proyecta cu Aruba por a ricibi aproximadamente 1.240 bishitante adicional for di Merca na mei y 1.360 na juni, manteniendo un crecemento estima di aproximadamente 12%.

CARIBE TA CAMBIA

E estudio ta señala cu turismo entre Caribe y Merca a baha durante e prome mitar di 2026. Entre e motibonan principal ta:

Costonan di biahe mas halto.

Prijs mas caro pa hotel y transporte.

Reglanan di visa y inmigracion mas estricto.

Consumidornan cu ta opta mas pa destinacionnan regional.

Apesar di e tendencia aki, algun pais a logra bai contra corriente.

ARUBA ENTRE E LIDERNAN

Ademas di Aruba, e otro paisnan cu a registra crecimiento den mercado Mericano ta:

Republica Dominicana (+7.7%)

Saint Martin (+25.6%)

Anguilla (+9.8%)

Guadalupe (+7.3%)

Martinique (+0.4%)

Saint Barthelemy (+37.9%)

Segun e informe, Aruba ta uno di e destinacionnan cu mas a aprobecha su conexionnan aereo fuerte, promocion turistico y e demanda continuo pa vacacionnan premium, permitiendo cu e isla ta sigui crece apesar di condicionnan economico menos faborabel den e region.