Gobierno ta reforsa control di frontera y cumplimento di ley migratorio

ORANJESTAD – Gobierno di Aruba ta intensifica su esfuerzo pa reforsa e control di frontera y cumplimento di ley migratorio. Esaki tabata e mensahe central durante un reunion lidera diaranson mainta pa Minister di Husticia, Integracion, Transporte Publico y Energia, Arthur Dowers, cu diferente instancia responsabel pa supervision di frontera y cumplimento di ley.

Durante e reunion, Minister Dowers a presenta un actualisacion di e programa Hunto pa Progreso y e prioridadnan strategico di Gobierno pa modernisa y fortalece e sistema di control migratorio. Representantenan di e diferente instancia tambe a comparti informacion tocante e progreso, e desafionan actual y con por fortalece e cooperacion entre tur partner.

Segun Minister Dowers, un cooperacion estrecho y bon coordinacion ta esencial pa mantene un frontera sigur, un sistema migratorio ordena y un cumplimento efectivo di leynan migratorio.

Na e reunion tabatin representantenan di Kustwacht Caribisch Gebied, DIMAS, Douane Aruba, Cuerpo Policial Aruba (KPA), Inmigracion Aruba, Guarda Nos Costa (GNC), Departamento di Asuntonan Huridico y Legislacion, e Voortgangscommissie Grenstoezicht y e gabinete di e Ministernan di Husticia y Finansa.