Afl. 203 miyon di surplus pa Presupuesto 2027 pa pais Aruba

ORANJESTAD – Gobierno di Aruba a manda e Presupuesto 2027 di pais Aruba oficialmente pa Raad van Advies pa su evaluacion, despues cu College Aruba financieel toezicht (CAft) a duna un conseho positivo riba e presupuesto.

Segun Minister di Finansa, Asunto Economico y Sector Primario, Geoffrey Wever, e punto mas importante di e presupuesto ta cu Aruba ta proyecta un surplus di Afl. 203 miyon, ekivalente na 2,3% di e Producto Interno Bruto (PIB).

Gobierno ta spera di mantene finansas publico fuerte tambe den e añanan siguiente. Den e plan financiero pa 2028 te 2031, ta proyecta un surplus anual di por lo menos 1,5% di e PIB, cumpliendo cu tur normanan financiero y reglanan establece den ley.

Despues cu Raad van Advies entrega su conseho, Gabinete AVP-FUTURO lo prepara e Nader Rapport y entrega oficialmente e Presupuesto 2027 na Parlamento di Aruba pa su tratacion, conforme e procedimiento legal.