AZV: Acusacionnan di famia Croes no ta corecto; cuido den exterior tin criterio

ORANJESTAD – AZV a rechasa e acusacionnan haci recientemente durante un conferencia di prensa door di Ricardo Croes y Fundacion SIKI, unda nan a alega cu e asegurador nacional tabata "condenando" un hoben pashent na un morto prematuro. Segun AZV, e afirmacionnan no ta corecto y no ta reflehda e proceso cu a wordo sigui den e caso. Den un comunicado, Organo Ehecutivo di AZV a indica cu, pasobra e caso ta involucra informacion medico confidencial, e no por drenta den detaye tocante e situacion specifico di e asegurado. Sinembargo, AZV a confirma cu e peticion presenta dia 7 di juli 2026 a haya "su debido atencion". Segun AZV, un plan di tratamento a wordo proponi, e asegurado a bay Colombia y a regresa Aruba, y durante tur e proceso e asegurado a wordo informa ampliamente tocante cual tratamento tabata posibel y cual no tabata cay bou di e cobertura di AZV. E decisionnan, segun AZV, a wordo basa riba evaluacionnan di e Comision di Oncologia di Aruba (HOH), e Commissie Grensoverschrijdende Zorg (CGZ) y e comision di oncologia CTIC na Colombia. "Despues di tuma nota di e acusacionnan, nos a considera importante pa clarifica un biaha mas con e proceso di cuido medico den exterior y e criterio di cobertura ta funciona," AZV a declara.

CON AZV TA EVALUA PETICIONNAN PA CUIDO DEN EXTERIOR

AZV a splica cu un pashent por wordo referi pa tratamento den exterior ora Aruba no tin e experticio medico necesario pa trata e malesa. Segun e asegurador, e proceso semper ta cuminsa cu e specialista tratante, kende ta presenta un peticion oficial na AZV despues di consulta cu e pashent. Segun AZV, solamente tratamentonan cu ta medicamente necesario, ampliamente acepta den practica medico, cu ta cay bou di e ley di cobertura di AZV y cu no por wordo ofrece na Aruba, por wordo aproba. Tratamentonan experimental of den fase di investigacion no ta entra den cobertura.

ROL DI CGZ

AZV a indica cu tur peticion pa cuido den exterior ta wordo revisa door di e comision medico independiente Commissie Grensoverschrijdende Zorg (CGZ). E comision, segun AZV, ta evalua si e tratamento ta medicamente necesario y si realmente no por wordo brinda na Aruba. Den casonan di cancer, AZV a bisa cu e peticionnan mester pasa prome pa e Comision di Oncologia di Aruba prome cu CGZ por tuma un decision.

LOKE UN APROBACION TA CUBRI

Ora un peticion ta aproba, AZV ta bisa cu e ta encarga di regla e cita, e biahe, estadia y, si ta aplicabel, un acompañante social. Cobertura, segun AZV, ta inclui pasashi di ida y buelta, gastonan medico, garantianan pa hotel y un aporte pa gastonan di cuminda. AZV a enfatisa cu e rapidez cu un pashent ta sali pa exterior ta depende di urgencia medico y disponibilidad na e hospital receptor. Den situacionnan hopi urgente, un air ambulance por wordo organiza.

DURANTE TRATAMENTO DEN EXTERIOR

AZV a splica cu ora un asegurado acepta e tratamento aproba, e ta sali for di e punto di bista cu e ta di acuerdo cu e condicionnan di cobertura. Durante e tratamento, AZV ta mantene contacto continuo cu e hospital den exterior y cu e specialista tratante na Aruba pa evalua progreso y, si ta necesario, adapta e aprobacion. Segun AZV, tambe por sosode cu durante tratamento den exterior, ta descubri otro complicacion medico. Den e caso ey, un peticion adicional mester wordo presenta y evalua prome cu e gastonan adicional por wordo cubri.

Finalmente, AZV a indica cu si un asegurado dicidi di no sigui cu e tratamento aproba, e persona mester regresa Aruba. Segun e asegurador, e condicionnan aki ta wordo comunica claramente na e asegurado y su acompañante prome cu e biahe.