Reapertura di frontera aereo cu Venezuela ainda no tin claridad

ORANJESTAD – Faltando apenas cuater dia pa e fecha anuncia pa bolbe habri e frontera aereo entre Aruba y Venezuela, ainda no tin informacion oficial cu ta confirma con e operacionnan lo cuminsa. Y esaki despues cu algun dia prome ainda, noticiacla a raporta cu cos tabata ‘avansando’. Esaki aparentemente no ta asina, of por lo menos, publicamente no ta conoci ‘ainda’.

Gobierno di Aruba a anuncia anteriormente cu e frontera aereo lo habri dia 1 di augustus 2026, pero te awe no a publica cua companianan aerea lo opera e rutanan, cuanto buelo lo tin pa siman, ni riba cua dianan nan lo sali. Prome Minister Mike Eman a declara den diferente entrevista cu e reapertura lo wordo implementa gradualmente y cu e coordinacion tecnico y administrativo ainda ta den progreso.

Inicialmente tabata papia di un solo buelo pa siman. Mas recientemente, e Prome Minister a menciona cu Gobierno ta trahando pa cuminsa cu dos frecuencia semanal, pero e informacion aki ainda no a wordo confirma oficialmente cu un calendario di buelo of un anuncio di algun compania aerea.

NoticiaCla a compronde di fuente no oficial cu tambe na Venezuela ainda tin incertidumbre riba e planificacion final. Segun diferente persona cu ta sigui e proceso, no ta cla si tur permiso y coordinacion bilateral entre ambos gobierno ya ta completa.

Esaki ta lanta pregunta, pasobra un reapertura di frontera aerea normalmente ta rekeri acuerdo entre e dos paisnan riba asunto manera aviacion civil, migracion, aduana y seguridad operacional.

Apesar cu e intencion politico pa reanuda e conexion aereo ta aparenta di ta cla, e falta di informacion concreto ta crea incertidumbre entre pasahero, sector turistico y comercio cu ta sperando pa e rutanan bolbe activo.

Te na momento di publicacion di e articulo aki, tampoco no tin ningun horario oficial di buelo ni anuncio di benta di pasashi pa e ruta Aruba-Venezuela. Mientras e fecha di 1 di augustus ta acerca rapidamente, e reapertura di e frontera aereo ta sigui den incertidumbre.