Gobierno ta avansando cu reapertura di vuelo cu Venezuela

ORANJESTAD – Gobierno di Aruba a oficialmente crea un  asina yama stuurgroep (grupo di directiva) pa coordina y supervisa e reapertura gradual di e conexionnan aereo entre Aruba y Venezuela. E decision, publica den e Landscourant di Aruba di dia 10 di juli ultimo, ta forma parti di e preparacion pa habri e frontera pa trafico aereo for di 1 di augustus 2026. Por corda con recientemente prome minister di Aruba Mike Eman a ‘slek’ e informacion aki despues di e tragedia di temblornan na Venezuela. Aki e la laga ‘los’ cu e plan tabata caba pa habri frontera aereo, y cu esaki awor kizas mester sosode mas liher. 

ACESORA GOBIERNO

Bek pa e version ‘original’ di e relato, e documento oficial ta bisa cu e grupo lo ta presidi door di e director di Directie Luchtvaart Aruba (DLA) y lo inclui representante di diferente ministerionan, incluyendo Asuntonan General, Husticia, Aviacion Civil y Finansa. Nan tarea principal ta asesora e ministeronan envolvi y sigui cu e reapertura ta tuma lugar di forma seguro, ordena y responsabel.

Entre e trabounan principal ta consulta cu stakeholdernan, coordina preparacionnan, haci analisis di riesgo, monitorea e progreso y presenta recomendacionnan pa e siguiente pasonan. E grupo tambe por involucra otro instancia gubernamental y Aruba Airport Authority (AAA) si ta necesario.

Ademas, e Grupo Directivo mester presenta un informe mensual na e ministeronan envolvi tocante e estado di e proceso, eventual riesgonan y recomendacionnan. E grupo ta wordo establece inicialmente pa un periodo di seis luna, cu posibilidad pa prolonga e mandato.