Gotopo: Aruba por beneficia hopi cu reapertura frontera aereo cu Venezuela

LA VELA DE CORO, Venezuela – E sector comercial y turistico di estado Falcón ta mira  e reactivacion di trafico aereo entre Aruba y Venezuela cu hopi optimismo, cu ta proyecta pa cuminsa dia 1 di augustus 2026. Segun Juan Gotopo, vicepresidente di Camara di Comercio y Turismo di La Vela de Coro, despues di siete aña di frontera cera, e momento a yega pa fortalece e lasonan historico entre ambos pueblo atrobe. "Nos tin expectativa hopi positivo cu e reapertura di frontera. Aruba y Venezuela semper tabata mercado importante pa otro, y pa Falcón e relacion cu Aruba ta esencial, specialmente den turismo medico," Gotopo a bisa. Segun e, pa hopi aña e arubiano tabata bishita Coro y Punto Fijo pa chekueonan medico y odontologico, danki na e calidad di e profesionalnan di salud y e preisnan competitivo cu Venezuela ainda ta ofrece. "Nos clinicanan, centro odontologico, hotelnan y operadornan turistico ta cla pa ricibi e mercado Arubiano atrobe. Nos ta ofrece servicio di calidad na preisnan atractivo," Gotopo a bisa.

SEÑAL POSITIVO

El a bisa cu e anuncio di Prome Minister Mike Eman cu inicialmente lo tin dos buelo pa siman ta un señal positivo. "Dos frecuencia pa siman ta cambia e panorama hopi. Esaki ta haci mas facil pa e arubiano bishita Falcón pa cuido medico y tambe pa Venezolanonan cu ta biba Aruba bolbe mira nan famia despues di siete aña," el a comenta.

WAF CHIKITO 

Gotopo tambe a expresa entusiasmo cu e plan di Gobierno di Aruba pa rehabilita mercado di e waf chikito, unda pa decenianan barconan for di Venezuela tabata bende fruta y pisca  directamente na pueblo. "Si waf chikito bolbe habri, lo aumenta exportacion for di Falcón pa Aruba. E pueblo Arubiano lo haya producto fresco, di bon calidad y na preis mas abou, mientras cu e productor Venezolano tambe lo beneficia," Gotopo a bisa.

TURISMO Y SEGURIDAD

Segun Gotopo, un campaña promocional cu e Camara di Comercio a haci algun aña pasa den un emisora arubiano a demostra cu tin interes real for di Aruba. "E reaccion di arubianonan tabata hopi positivo, specialmente ora nan a mira e preisnan di hospedaje, cuido medico y otro servicio. Aruba tin un mercado cu ta aprecia calidad y bon prijs," el a bisa. El a agrega cu Falcón actualmente ta considera un di e estadonan mas sigur di Venezuela. "Nos ta invita tur arubiano pa bishita Falcón ora e frontera aerea habri. Nan lo haya un estado sigur, hopi belleza natural y servicio turistico di calidad," Gotopo a conclui.