Aruba ta explora importacion di mas fruta y berdura fresco for di Peru

LIMA, Peru – Prome Minister Mike Eman a reuni cu Gabriel Amaro Zamora, presidente di AGAP, pa papia riba posibilidadnan pa aumenta importacion di fruta y berdura fresco for di Peru pa Aruba.

Durante e reunion, nan a analiza e demanda cu Aruba tin pa producto fresco, tanto pa e poblacion como pa sector hotelero. Entre e productonan menciona tabata blueberry, druif y otro tipo di fruta y berdura.

Segun AGAP, Peru ta un di e exportadornan mas grandi di producto agricola den mundo y ta suministra mas di 150 pais. E organizacion ta mira Aruba como un mercado cu potencial, aunke ta necesario evalua demanda, volumen y e logistica pa haci e suministro posible.

E reunion ta marca un prome paso pa explora un cadena di suministro mas directo entre Aruba y Peru.