Rotterdam ta celebra un Zomercarnaval yen di color y cultura

ROTTERDAM – Rotterdam a celebra su famoso Zomercarnaval, un evento cu pa mas cu 40 aña a reuni diferente cultura den un ambiente di musica, baile y creatividad un biaha mas.

Prome cu e gran parada, Stadhuis di Rotterdam a ricibi un recepcion oficial den presencia di alcalde Carola Schouten y diferente invitado  special. Arubahuis tabata representa durante e acto pa Sidney Kock, encargado di Public Relations.

Den su discurso, alcalde Schouten a destaca e balor cultural di Zomercarnaval, cu ta reconoci como Patrimonio Cultural Inmaterial di UNESCO. El a gradici tur persona cu durante mas di cuatro decada a contribui pa haci e festival un exito.

Segun Schouten, Zomercarnaval no solamente ta uni diferente comunidadnan y cultura den Rotterdam, sino cu tambe ta mustra e pasion, creatividad y diversidad cu caracteriza e ciudad.

E alcalde a anuncia tambe cu Rotterdam Unlimited Zomercarnaval a ricibi e Oeuvreprijs Rotterdam 2026, un reconocemento pa su enorme contribucion na e reputacion di Rotterdam como un ciudad habri, creativo y dinamico.

Despues di e recepcion, e invitadonan a sigui e gran parada for di un podium special dilanti di Stadhuis.