Corsou ta yuda HOH cu preparacion di medicamentonan special

WILLEMSTAD/ ORANJESTAD – Como consecuencia di e salida temporal di e facilidad pa prepara medicamentonan di alto riesgo na Hospital Horacio Oduber (HOH) na Aruba, e botica di Curaçao Medical Center (CMC) ta brinda apoyo pa garantiza continuidad di e cuido.

Te awor, HOH no a haci un anuncio oficial tocante e situacion. Segun informacion cu e corant di Corsou Antilliaans Dagblad a ricibi, botica di CMC desde mitar di juni ta encarga cu preparacion temporal di, entre otro, citostatica pa pashentnan na Aruba. Esaki lo sigui te ora cu e 'cleanroom' nobo di HOH wordo valida y por drenta den uso.

Citostatica ta medicamentonan fuerte cu ta inhibi of stop e crecemiento di celulanan. Nan ta wordo usa principalmente den tratamiento di cancer, pero tambe pa cierto otro enfermedadnan, manera reuma.

Pa haci posible cu e cuido sigui sin interrupcion, hospitalnan, autoridadnan di aduana, serviciunan di inspeccion y minister responsabel na Corsou y Aruba a coordina nan trabou intensivamente. E ministernan concerni tambe a wordo manteni informa.

Tur dia e medicamentonan ta wordo transporta pa Aruba. E preparacionnan ta wordo realiza door di asistentenan di apoteca di Aruba den CMC, pa evita cu e capacidad di e apoteca na Corsou wordo sobrecarga.