GOL lo stop cu vuelo directo entre Brasil y Aruba na oktober

ORANJESTAD – GOL Linhas Aéreas lo pone fin na su servicio directo entre São Paulo, Brasil, y Aruba na luna di oktober 2026. E anuncio a wordo haci pa Aruba Airport Authority (AAA) y Aruba Tourism Authority (A.T.A.) diahuebs, kende a expresa nan agradicemento pa e colaboracion cu e aerolinea durante e periodo cu el a opera e ruta.

Segun GOL, e decision ta parti di un revision di su strategia comercial y ta basa riba condicionnan di mercado y e sostenibilidad operacional y financiero di e compania. AAA y A.T.A. a indica cu e decision no ta cambia e bon relacion cu a wordo construi entre Aruba y GOL.

Desde cu e ruta directo a cuminsa, GOL a contribui na mehora e conectividad entre Aruba y Brasil y a yuda amplia e mercadonan di turismo di e isla. Brasil ta sigui considera un mercado strategico den e plan di Aruba pa diversifica su turismo, pasobra e pais tin potencial pa atrae bishitantenan cu gasto mas halto.

Apesar cu e vuelo directo lo termina na oktober, e organisacionnan ta splica cu biaheronan for di Brasil lo por sigui yega Aruba via diferente conexion. Vuelonan for di São Paulo lo sigui disponibel pa reserva a traves di partnernan di GOL, mientras otro aerolineanan tambe ta ofrece ruta di conexion entre Brasil y Aruba.

AAA, A.T.A. y Ministerio di Turismo a reafirma cu nan lo sigui traha cu aerolineanan y partnernan internacional pa fortalece e conectividad cu Brasil y investiga posibilidadnan pa bolbe introduci un servicio directo den futuro.