Respaldo ta introduci maneho contra "no show" pa baha lista di espera

ORANJESTAD – Fundacion Salud Mental Aruba (Respaldo) lo introduci un maneho nobo for di 1 di augustus 2026 pa reduci e cantidad di clientenan cu no ta presenta na nan cita of cu ta cancela repetidamente. E meta ta pa usa e capacidad di psikiatranan y psicologonan mas eficientemente y mehora acceso na cuido di salud mental.

Segun Respaldo, e demanda pa cuido ta sigui aumenta, mientras cu e cantidad di profesionalnan disponibel ta limita. Actualmente, un promedio di 30 dia di trabou pa luna ta bai perdi pa motibo di clientenan cu no ta presenta na nan cita.

E maneho nobo ta stipula cu un cliente cu falta dos cita consecutivo sin avisa por perde su tratamiento, y lo mester un nobo verwijsbrief di su dokter di cas pa cuminsa di nobo. Si un cliente cancela dos cita consecutivo, lo wordo advirti cu un siguiente cancelacion por resulta den cierre di su caso.

Respaldo ta enfatisa cu e medida no ta pa castiga clientenan, sino pa reduci e lista di espera, baha e tempo di espera, mehora e uso di e capacidad profesional y fortalece e continuidad di tratamentonan.