Jetten no ta menciona tema mas sensitivo durante bishita na Corsou

WILLEMSTAD – Prome Minister Hulandes Rob Jetten a comparti un mensahe positivo riba su bishita na Corsou, resaltando cooperacion den Reino, seguridad, sostenibilidad y desaroyo di bario. Sin embargo, e no a menciona e temanan mas sensitivo cu a wordo trata durante e reunionnan oficial. Asina e portal curacao.nu ta raporta. 

Entre e asuntonan cu a keda afo di su relato, ta e futuro di e landspakket, refinanciacion di prestamonan Hulandes, reforma di gobierno y otro decisionnan financiero importante. Tambe no a menciona e discusion tocante e posicion di Hulanda den un resolucion di Naciones Uni riba  sclavitud, un tema cu a provoca critica den Caribe. Segun e informe, e bishita tabatin enfoke riba futuro di relacionnan den Reino, lucha contra pobreza, seguridad y transicion pa energia renobabel.