Ombudsman ta pidi cambio den maneho di ausencia pa malesa na scol

ORANJESTAD – Ombudsman Jurima Bryson a publica e rapport "E Prijs di ta Malo", concluyendo cu e maneho actual di ausencia pa motibo di malesa den enseñansa mester wordo adapta. Segun e investigacion, e obligacion pa presenta un declaracion medico por crea bareranan financiero y practico pa algun alumno y nan famia, especialmente ora nan mester recupera un toets of examen.

E rapport ta indica cu scolnan no ta aplica e reglanan di forma uniforme, causando falta di claridad tocante e exigencianan y e consecuencia di no por presenta un declaracion medico. Ombudsman ta enfatisa cu e derecho di mucha na educacion, igualdad di oportunidad y proteccion di privacidad mester keda central den tur decision.

Entre e recomendacionnan ta introduci reglanan mas uniforme, reduci bareranan financiero, duna mas informacion na mayornan y alumnonan, crea mas flexibilidad pa situacionnan individual y mehora e proteccion di datonan medico. Ombudsman lo sigui monitorea e implementacion di e recomendacionnan.