Di cinco asesinato na Corsou e aña aki despues di haya homber morto na Cocori

WILLEMSTAD – Un homber a wordo haya morto diarason mainta den un area di mondi na Seri Cocori, Fuik. Polis ta sospecha cu e homber a wordo asesina, despues cu nan a haya un herida den e parti abou di su boca. Ambulance y dokter di polis a confirma su fayecimento, mientras cu investigadornan forensico a cuminsa un investigacion amplio. E curpa a wordo confisca pa investigacion adicional.

Ainda no a revela e identidad di e victima oficialmente, pero diferente informe ta indica cu ta trata di un homber di nacionalidad haitiano, propietario di un compania di limpiesa. Segun informacion, su famia a reporta cu e tabata desapareci un dia prome. Personanan cerca di dje ta describie como un persona trankil cu no tabata conoci pa problema.

Cu e caso aki, Corsou ta registra su di cinco asesinato di 2026. E otro cuater caso tabata inclui diferente tiramento mortal na Mambo, Julian, Ser'i Papaya y Rotonde di Zegu. Te ainda, varios di e investigacionnan no a resulta den detencion di sospechosonan, y den tur e caso conocido te awor, arma di candela ta parece a wordo usa.