Wingo ta fortalece conectividad entre Aruba y Colombia

ORANJESTAD – Aruba a celebra e expansion di su conectividad aerea cu Colombia cu e inauguracion oficial di e ruta directo di Wingo entre Barranquilla y Aruba. Durante e ceremonia na Aeropuerto Internacional Reina Beatrix tambe a wordo resalta e reciente apertura di e ruta entre Bucaramanga y Aruba.

Minister di Turismo, Transporte y Labor, Wendrick Cicilia, a indica cu e rutanan nobo ta forma parti di e estrategia pa diversifica e mercado turistico, amplia conectividad y crea mas oportunidad economico pa Aruba.

Segun e minister, e conexionnan cu Barranquilla y Bucaramanga no solamente lo impulsa turismo, sino tambe comercio, inversion, cuido medico, reunion familiar y intercambio cultural.

Wingo awo ta ofrece conexionnan directo entre Aruba y cinco ciudad den Colombia. E vuelo inaugural for di Barranquilla a yega cu mas cu 90% di ocupacion, mientras cu e vuelo di regreso a sali cu un ocupacion di 98%, señalando un demanda fuerte pa e ruta nobo.