DVG ta alerta pa aumento di Rotavirus den muchanan na Aruba

ORANJESTAD – Directie Volksgezondheid (DVG) dialuna a alerta comunidad tocante un aumento den e cantidad di casonan di Rotavirus bou muchanan entre 0 y 14 aña, segun datonan recien di su sistema di vigilancia epidemiologico. E cantidad di caso ta mas halto cu den añanan anterior.

Rotavirus ta un di e principal causanan di gastroenteritis den muchanan y e virus ta propaga hopi facil pa medio di contacto cu man, obhetonan of superficienan contamina. Lugarnan unda muchanan ta reuni, manera kleuterschool, scolnan y centronan di cuido, ta presenta un riesgo mas grandi di contagio.

DVG ta pidi mayornan pa keda alerta pa sintomanan manera:

Dolor di stoma.

Falta di apetit.

Señal di deshidratacion, manera boca seco, poco orina, yora sin lagrima of cansancio extremo.

Autoridadnan ta enfatisa cu si un mucha presenta diarrea of sacamento, e mester keda na cas y no bai scol. Esaki ta yuda preveni cu e virus ta sigui propaga entre otro muchanan.

Ademas, DVG ta conseha pa laba man regularmente cu awa y habon, specialmente despues di uza baño y prome di come. Tambe ta importante pa limpia y desinfecta co’i hunga, mesanan y otro superficienan cu ta wordo toca hopi biaha.

Mayor mester busca atencion medico inmediatamente si un mucha ta mustra señalnan di deshidratacion, no kier bebe awa, ta sigui saca, tin diarrea severo of si e sintomanan ta empeora.

Segun DVG, cu cooperacion di mayornan, scolnan y centronan di cuido, ta posible limita e propagacion di Rotavirus y proteha salud di muchanan Aruba.