Hulanda kier fortalece cooperacion policial cu Aruba, Corsou y Boneiro

ORANJESTAD – Gobierno di Hulanda kier fortalece ainda mas e cooperacion policial cu Aruba, Corsou y Boneiro pa enfrenta e menaza creciente di criminalidad transnacional. Esaki ta sali for di un vision nobo tocante cooperacion policial internacional cu Ministerio di Husticia y Seguridad di Hulanda a presenta na Parlamento Hulandes.

Segun e documento, criminalidad moderno ta opera cada biaha mas sin respet pa frontera. Organisacionnan criminal ta combina actividadnan manera trafico internacional di droga, labamento di placa, cybercriminalidad, trafico di hende y corrupcion, haciendo cooperacion internacional indispensable.

Pa e partinan Caribe di Reino, e informe ta enfatisa cu cooperacion entre e diferente cuerponan policial ta di importancia strategico. Gobierno Hulandes ta confirma cu Aruba, Corsou y Sint Maarten ta sigui responsable pa nan propio mantenecion di ley y orden, pero cu nan lo sigui traha estrechamente cu Hulanda y cu Korps Politie Caribisch Nederland.

Dos biaha pa aña, ministernan di Husticia di e cuater paisnan di Reino ta reuni den e Justitieel Vierpartijenoverleg (JVO) pa coordina nan politica y cooperacion. Na nivel operacional, e Colegio di Korpschefnan lo ricibi financiamiento estructural for di 2026 pa fortalece coordinacion, desaroya un vision comun y mehora gobernansa.

E documento ta mustra tambe cu e Recherche Samenwerkingsteam (RST), cu ta traha pa Aruba, Corsou, Sint Maarten y Caribisch Hulanda, ta sigui ocupa un rol importante den investigacionnan di criminalidad grave y transfronterizo. Na 2027 lo wordo haci un evaluacion pa determina con e RST por adapta su trabou na e cambionan den e region.

Gobierno Hulandes ta mira tambe oportunidadnan pa amplia cooperacion cu Surinam. Segun e informe, e idioma comun, e contexto Caribe y e sistema legal comparable ta facilita intercambio di conocemento, entrenamento y eventual apoyo operacional, specialmente den un momento cu tur cuerponan policial den e region ta confronta escasez di personal.

Ademas, e liaison officer na Corsou lo sigui ocupa un papel clave den intercambio di informacion entre e diferente paisnan di Reino, mientras cu Hulanda kier desaroya un strategia comun pa intercambio di informacion policial den henter Reino.

Segun Ministerio di Husticia y Seguridad, solamente door di confianza mutuo, intercambio rapido di informacion y cooperacion estrecho lo por enfrenta e forma cada biaha mas compleho di criminalidad internacional cu ta afecta tambe Aruba, Corsou y Boneiro.