Dos detencion mas den investigacion di tiramento na Mandolinstraat

Posted on 9/4/2026, 11:03 AM AST | Updated on 9/4/2026, 11:04 AM AST

ORANJESTAD — Cuerpo Policial Aruba diabierna mainta a informa cu investigacion den e tiramento cu a tuma luga dia 26 di augustus na Mandolinstraat, Dakota, ta sigui activamente y cu dos detencion adicional a wordo haci den e caso.

E incidente a pasa alrededor di 3’or di marduga, ora polis a ricibi notificacion cu un homber a wordo tira dilanti di su cas. Patruyanan y ambulance a wordo despacha pa e sitio.

Na yegada, polis a encontra un homber di 20 aña cu herida di bala. Personal di ambulance a stabilisa e victima y transport’e cu urgencia pa hospital. Recherche y polis tecnico a inicia investigacion na e sitio.

Segun polis, e investigacion ainda ta den pleno desaroyo y no ta wordo descarta cu mas detencion por sigui den e dianan venidero.

Cuerpo Policial Aruba ta pidi cualkier persona cu tin informacion tocante e caso pa contacta tipline di polis na 11141.