Boluntarionan di Rode Kruis Aruba ta brinda apoyo na mision internacional di rescate na Venezuela

ORANJESTAD – Boluntarionan di Rode Kruis Aruba ta desempeña un rol importante den e operacion internacional di ayudo humanitario na Venezuela, unda ekiponan di rescate di diferente pais ta sigui brinda asistencia despues di e desastre natural reciente.

E team di Aruba ta duna apoyo medico y logistico na ekiponan di Search & Rescue for di Costa Rica, Chile, Merca, Portugal y otro organisacionnan cu ta activo den e areanan afecta.

Nan tarea principal ta pa vela pa salubridad y seguridad di e rescatistanan cu ta traha bou di circunstancianan sumamente dificil y peligroso, mientras e buskeda pa sobrevivientenan den edificionan colapsa ta continua.

Un di e momentonan mas impresionante durante e mision tabata e rescate di un persona cu a keda atrapa bou di e ruinan pa mas cu 100 ora na Playa Grande. E rescate ey a mustra claramente e determinacion y cooperacion internacional di e ekiponan di emergencia.

Segun Rode Kruis Aruba, trabao humanitario ta bay hopi mas leu cu solamente rescata victimanan. Tras di cada bida cu ta wordo salva tin un red di personal medico, apoyo logistico y boluntarionan cu ta traha hunto den circunstancianan hopi exigente.

Rode Kruis Aruba a expresa su gran apreciacion pa e compromiso, profesionalismo, compasion y perseverancia di su boluntarionan, y a reafirma cu Aruba lo sigui aporta na misionnan internacional di ayudo humanitario ora cu nan ta mas necesario.