Huez: Investigacion adicional y informe psicologico ainda ta pendiente den caso di hit and run fatal

ORANJESTAD – E huez cu ta trata e caso penal di hit and run fatal, contra C. Fernandez Pedra a indica diabierna den Corte cu ainda tin diferente documento y investigacion adicional pendiente prome cu e proceso por sigui. Durante e audiencia, e huez a informa cu varios documento nobo a wordo agrega na e dossier. Entre nan tin decisionnan di Corte di Apelacion, documentacion relaciona cu declaracionnan di testigonan y un decision relaciona cu articulo 57 di Codigo di Procedura Penal.

Segun e huez, tambe a ricibi un decision for di autoridadnan competente na Aruba, manera tambe un carta cu a wordo entrega e mainta di abogado Moszkowics.

E huez a splica cu recientemente e la tuma cargo di e caso despues cu un colega a transferi e dossier. Despues di studia e documentacion, e la conclui cu ainda tin diferente punto cu mester mas aclaracion.

Segun e huez, adicionalmente a wordo incorpora documentacion extra na dossier y tambe tin contacto cu autoridadnan na Hulanda pa evalua si ta tecnicamente posible haci un investigacion riba e sistema electronico of "hard drive" di e vehiculo envolvi den e accidente. E huez a bisa cu e investigacion tecnico tabata un di e puntonan cu e mes a solicita pa wordo aclara.

Ademas, Corte ainda ta wardando e informe di e psicologo, cu tambe por forma parti importante di e expediente den e caso.

E proceso penal contra Fernandez Pedra ta sigui pendiente mientras cu e diferente investigacionnan y documentonan adicional ta wordo completa. Riba pregunta di huez, fiscal a sigura cu e la haci un peticion pa investiga e hard drive di e auto en cuestion, pa haya dato importante manera e velocididad cu e auto tabata core, si a brake, etc etc.. Pero e no por a bisa cuanto tempo tur esaki lo tuma pa keda cla. Pa dia 20 di augustus proximo, huez kier sa con ta para cu e situacion y tur investigacion, pa despues dia 2 di oktober proximo, trata e caso integralmente.