Huez a habri caso bek di hit & run cu a resulta den morto di un turista

ORANJESTAD – Huez diabierna mainta a informa e acusado O. Duran Peña (e chauffeur colombiano - acusa di a hit and run dos persona aña pasa cu resulta cu un di e victimanan turista a fayece-, cu e la dicidi di habri e investigacion, despues cu e a conclui cu ainda no tin suficiente evidencia pa por tuma un decision final. E caso ta trata di un chauffeur acusa di homicidio culposo, bandona e lugar di accidente y conduci bou di influencia. Durante e audiencia diabierna mainta, e huez a indica cu, aunke Ministerio Publico a pidi pa declara e sospechoso culpabel y defensa a pidi absolucion, e dossier actual no ta contene suficiente informacion pa por yega na un conclusion definitivo.

RELACION DIRECTO ENTRE ACCIDENTE Y MORTO DI E VICTIMA

Segun e huez, un di e preguntanan mas importante den e caso ta si tin un relacion directo entre e accidente y morto di señora Barnett. E dossier ta mustra cu despues di e accidente, e victima a wordo haya na banda di caminda cu su parti inferior di curpa den un posicion abnormal. Despues di esey e la wordo transporta pa hospital, unda e la fauece dos siman despues. Sinembargo, segun huez, no tin ningun informe medico den e file, cu ta splica cua heridanan e victima a sufri ni cual tabata e causa exacto di su morto. "Sin e informacion medico ey, Corte no por asumi automaticamente cu e morto tabata un consecuencia directo di e accidente," e huez a expresa. P'esey, Corte a ordena Ministerio Publico pa agrega na e dossier tur informacion medico relaciona cu e heridanan y causa oficial di morto di señora Barnett.

Ademas di esey, e huez a bisa cu tambe tin necesidad di mas claridad tocante con e accidente a tuma luga. Segun e acusacion, e chauffeur no a mira e victimanan, pero durante audiencia e sospechoso a declara cu e si a mira nan, pero cu ya no tabatin oportunidad pa evita e impacto. Pa por aclara e ultimo momentonan prome cu e accidente, Corte a determina cu señora Rodriguez, kende tabata presente durante e audiencia via videoconferencia for di Colombia, mester wordo tendi oficialmente como testigo. E huez a reconoce cu por ta emocionalmente dificil pa señora Rodriguez duna un declaracion, pero a enfatisa cu su testimonio ta indispensable pa un evaluacion completo y husto di e caso.

Mientrastanto, Corte a dicidi cu e sospechoso lo sigui den detencion preventivo. Segun e huez, e sospechanan serio contra e acusado ta sigui existi y actualmente no tin ningun circunstancia personal cu ta hustifica suspension di e detencion. E dossier lo wordo transferi pa e huez-comisario pa tende señora Rodriguez como testigo y pa incorpora e informacion medico necesario. Despues di esey, e caso lo wordo programa pa un siguiente audiencia.

Segun e huez, Corte ta busca fixa un fecha nobo mas pronto cu ta posible, pero en todo caso e siguiente audiencia mester tuma luga den un periodo no mas largo cu cuatro luna, tumando na cuenta e termino legal di e detencion preventivo.