Chauffeur femenino di hit & run a pidi huez p'e warda su caso den libertad

ORANJESTAD – "Mi no ta un criminal. Esaki tabata un accidente terrible." Cu e palabranan ey, C. Fernandez Pedra a pidi Corte diabierna mainta pa lag’e spera e resto di su proceso penal den libertad. Fernandez Pedra ta e chauffeur envolvi den e accidente fatal di 4 di januari 2026, unda dos peaton a perde nan bida. Durante e audiencia, Fernandez Pedra a papia directamente cu e hues, pasobra, segun e, actualmente e ta sin representacion legal. E la bisa cu e peticion pa un abogado specialisa for di Hulanda a wordo rechasa y cu diferente abogado local a retira di su defensa.

SIN ABOGADO

"Mi ta actualmente sin abogado cu ta representa mi," Fernandez Pedra a declara. "Mi ta pidi (Corte) permiti mi spera e resto di mi proceso mientras cu mi ta den libertad." Segun e acusado, e caso tin un caracter excepcional debido na e gran impacto social y mediatico.

HOPI CONMOCION

"Mi caso a causa hopi conmocion riba henter e isla. Dos persona a perde nan bida y e presion social ta enorme," e la bisa, argumentando cu precisamente pa e motibo ey e kier un abogado cu experiencia den casonan complehwo. Fernandez Pedra tambe a expresa profundo remordimiento pa e tragedia. "Lo cu a pasa ta terribel. Mi ta carga cu esey tur dia y lo mi sigui carga cu esey pa resto di mi bida. Mi nunca tabatin intencion pa esaki pasa," segun su declaracion na corte.

NO TA PELIGER PA SOCIEDAD

Segun dje, e no ta representa un peligro pa sociedad. "Esaki ta di prome biaha den mi bida cu mi tin contacto cu ley. Mi no ta un criminal ni un peliger pa comunidad," e a afirma. E la agrega cu e ta dispuesto pa cumpli cu cualkier condicion cu corte impone, manera obligacion di raporta, prohibicion di conduci of otro medidanan.

SALUD MENTAL

E hoben di 24 aña tambe a bisa cu detencion ta afecta seriamente su salud mental. "Continuacion di mi detencion no ta yudami. Al contrario, e ta hasi mi situacion peor," e la declara, añadiendo cu un psicologo externo ta dispuesto pa trata su trauma.

INOCENTE TE LO CONTRARIO KEDA COMPROBA

Na final di su declaracion, Fernandez Pedra a pidi Corte considera cu ainda no tin un sentencia den su contra. "Mi no a wordo condena ainda. Mi ta pidi pa trata mi manera un persona inocente te ora cu lo contrario wordo comproba," e a conclui. Huez a tuma e peticion den consideracion. Pero despues di un pausa di 15 minuut, e la dicidi cu Fernandez Pedra ta keda cera den detencion preventive na KIA. “Mi tin mal noticia pa bo. Bo ta kedad deteni” e huez a bisa e acusado. Segun e huez, tin suficiente motibo fuerte pa mantene e acusado cera. Ademas e comunidad ainda ta den shock, y ademas huez a bisa di no por pensa di condicionan bou di cual e acusado por warda su tratamento di caso den Libertad. E caso penal relaciona cu e accidente fatal di 4 di januari ta sigui pendiente y ta wordo trata dia 2 di oktober proximo pa 8’or y mei di mainta. NOTA; E potret ta un dramatisacion di e evento y no ta potret actual di e auto cu a causa e accidente, ni e silhouet real di e persona.