OM: C.Fernandez Pedra ta enfrenta cinco acusacion serio den caso di hit and run fatal

ORANJESTAD – Ministerio Publico (MP) a presenta diabierna su rekisitorio den e caso penal contra Chania F.P., e chauffeur sospechoso den e accidente di hit and run di 4 di januari 2026, unda dos peaton a perde nan bida y dos otro persona a sobrevivi. Segun Fiscal, e acusacion ta consisti di cinco hecho penal cu tur a tuma luga e mesun dia na Aruba.

E ACUSACIONAN 

E acusacion principal ta homicidio. Segun Ministerio Publico, e sospechoso tabata conduciendo un Jeep Compass sin un rijbewijs valido, bou di influencia di alcohol, den un estado emocional y na un velocidad considerablemente mas halto cu e permiti. Fiscal a sostene cu e velocidad tabata “irresponsablemente halto” y cu e chauffeur no tabatin posibilidad di para e vehiculo den distancia cu e por a observa e caminda y reacciona na situacionnan di trafico. Segun MP, e sospechoso tampoco a presta suficiente atencion na otro usuario di caminda, specialmente peatonnan cu tabata cruzando, no a mantene suficiente na banda drechi di e caminda, a conduci parcialmente of completamente riba e parti mei mei di e caminday no a tuma maniobra pa evita e impacto. Basando riba e mesun comportamiento, Ministerio Publico a presenta tambe acusacion subsidiario pa violacion di Ley di Trafico y, mas subsidiariamente, pa pone otro usuario di caminda den peligro. Ademas, Fiscal ta acusa Fernandez Pedra di dos intento di homicidio, basa riba e mesun forma di conduci. Como acusacion alternativo, MP ta sostene cu por tin dos intento di causa daño corporal grave. E di tres acusacion ta e hecho cu e sospechoso a sigui conduci despues di e accidente, sin para na e lugar di e impacto. E di cuater acusacion ta conduci bou di influencia di alcohol. E di cinco y ultimo acusacion ta conduci un vehiculo sin un rijbewijs valido. Ministerio Publico a presenta e acusacionnan durante e audiencia, mientras cu corte lo continua trata e caso dia 2 di oktober proximo, pa despues tuma un decision.