Conseho di Cumplimento di Ley: Screening di personal di husticia na Caribe hulandes no ta sufisiente

KRALENDIJK – E Conseho di Cumplimento di Ley a publica un informe den cual e ta conclui cu e sistema actual di screening di empleado di organizacionnan di husticia na Hulanda Caribe no ta reuni e exigencianan necesario y ta crea riesgo serio pa integridad y seguridad di e sistema judicial.

E investigacion a enfoca riba Ministerio Publico BES, Cuerpo Policial Hulanda Caribe, prizon di Hulanda Caribe, Consejo Tutelar y Fundacion di Reclassering.

Segun e informe, ta pasa regularmente cu empleado nan ta cuminsa traha prome cu e proceso completo di screening a finalisa. Esaki por haci cu personanan cu ainda no a wordo evalua completamente haya acceso na informacion confidencial y otro responsabilidadnan sensitivo.

E Conseho tambe critica cu e regla ministerial pa haci investigacionnan di confiabilidad mas estricto pa polisnan ainda no ta existe. Segun e organismo, esaki ta un falta serio di Ministerio di Husticia y Seguridad di Hulanda.

Ademas, e informe ta indica cu falta coordinacion central y cu no ta cla ken ta responsabel pa supervisa e proceso. P'esey, e Conseho ta pidi gobierno Hulandes pa fortalece e sistema di screening y tuma accion urgente pa elimina e vulnerabilidadnan den e organisacionnan di husticia na Hulanda Caribe.