Detenido di 60 aña ta fayece den cel na Warda di Polis San Nicolas

SAN NICOLAS – Un homber di 60 aña, naci na Aruba, a fayece diaranson anochi mientras cu tabata den detencion na Warda di Polis San Nicolas.

Segun informacion oficial di Cuerpo Policial Aruba, alrededor di 8:20 di anochi, durante un control rutinario di detenidonan den e celnan, polis a ripara cu e detenido no tabata reacciona.

Inmediatamente, e chef di dienst y Central di Polis a wordo notifica, cu despues a informa e autoridadnan competente. Na e sitio a presenta e Hefe di Distrito, e dokter forensico, Polis Technico y Landsrecherche pa inicia e investigacion correspondi.

Departamento di Slachtofferhulp tambe a presenta pa brinda guia y apoyo na e famia durante e momento dificil aki.

E caso ta actualmente bou investigacion di Landsrecherche pa determina e circunstancianan rond di e fayecimento.

Cuerpo Policial Aruba a expresa su condolencia na famia y sernan keri di e fayecido.