A.T.A :Turismo responsabel ta keda e centro di promocion di Aruba

ORANJESTAD – Aruba Tourism Authority (A.T.A.) ta sigui fortalece su campaña internacional "When You Love Aruba, It Loves You Back", lansa na 2025, cu e meta di promove un forma di turismo mas responsabel y consciente. Den 2026, e strategia ta sigui pone enfasis riba proteccion di e isla, respet pa cultura local y un conexion mas profundo entre Aruba y su huespednan. Segun CEO Ronella Croes, A.T.A. a cambia su manera di comunica cu mercado internacional. Enbes di solamente promociona Aruba como un destinacion di vacacion, e campaña ta presenta e isla como un hogar cu mester wordo cuida y proteha.

MAS CU UN DESTINACION

"Nos no ta bende solamente un destinacion. Nos ta invita futuro huespednan pa comprende cu Aruba ta nos cas y cu e belleza natural y cultural di nos isla merece respet y proteccion," Croes a indica. Pa fortalece e mensahe, A.T.A. a realiza un produccion audiovisual di seis dia na mas cu 50 locacion na Aruba, cu participacion di mas di 75 talento local. E produccion ta inclui fotografia, video, un voz local y un banda sonoro original cu ta incorpora sonidonan natural di Aruba.

EXPERIENCIA AUTENTICO DI ARUBA

E campaña ta pone enfasis riba e experiencia autentico di Aruba: e ritmo trankil di bida, gastronomia local, naturaleza y, mas cu tur, hospitalidad di pueblo Arubiano. E concepto principal ta cu un huesped cu trata Aruba cu amor y respet, lo haya e mesun trato bek. Como parti di e campaña, A.T.A. tambe a produci un cortometraje cu ta conta e amistad entre un hoben Arubiano y un turista, resaltando con comparti cultura y proteha naturaleza por crea un experiencia inolvidabel.

MOTIVA CADA HUESPED

Cu e iniciativa aki, A.T.A. ta busca no solamente crea mas conscientisacion, sino motiva cada huesped pa contribui activamente na preservacion di Aruba. E mensahe central ta sigui siendo claro: ora bo stima Aruba, Aruba ta stima bo bek.