Zr.Ms. Groningen ta bolbe rumbo pa La Guaira cu ayudo humanitario; Hopi cadaver den haf

WILLEMSTAD – E bapor di marina Hulandes Zr.Ms. Groningen a sali dialuna atrobe for di Corsou rumbo pa e ciudad portuario di La Guaira, Venezuela, cu un cargamento nobo di ayudo humanitario. Segun comandante Alex Ariëns Dwarshuis, e situacion den e area cu a wordo afecta pa e dos temblornan fuerte ta extremadamente serio. El a revela cu actualmente tin centenares di cadaver den e haf di La Guaira. E bapor a hiba awa, material di emergencia, suministronan medico y generadornan di coriente pa sostene e operacionnan di rescate y asistencia. Un dia promé, Zr.Ms. Groningen a entrega e prome cargamento di ayudo na e region devastá pa e desastre natural. Na yegada na La Guaira, e ayudonan a wordo entrega na autoridadnan Venezolano. Cu apoyo di personal di marina Hulandes, e suministronan despues a wordo transporta pa un estadio, unda cientos di persona cu a perde nan cas ta haya refugio temporal.

DAÑO TA ENORME

Segun comandante Ariëns Dwarshuis, e destrucccion den La Guaira ta enorme. For di laman por mira numeroso edificio di apartamento cu a cay completamente, mientras cu e haf tambe a sufri daño severo. “E banda nort di e haf actualmente ta wordo usa como un mortuario temporal. Aya tin centenares di cadaver cu ainda no a wordo identifica of retira,” a declara e comandante. Despues di entrega e prome cargamento, Zr.Ms. Groningen a bolbe Corsou pa carga un cantidad nobo di ayudo humanitario. E trayecto entre Corsou y La Guaira ta dura aproximadamente ocho ora.

MARINA TA PREPARA PA SIGUI BRINDA APOYO

Durante e siguiente biahenan, e bapor posiblemente lo entrega ayudo tambe na comunidadnan cu ta dificil di yega. Esaki por wordo haci cu helicopter of boto lihe, aunke e tipo di operacion ta tuma mas tempo cu descarga directo den haf. Cuantu tempo e operacion humanitario lo dura, lo depende di e necesidadnan cu ta bini for di Venezuela. Segun comandante Ariëns Dwarshuis, Forzanan Arma Hulandes den Caribe ta cla pa sigui sostene e esfuerzo humanitario durante un periodo largo si e situacion ta exigi esey. Te ainda, Venezuela no a haci ningun peticion oficial pa transporta heridonan rumbo pa Corsou pa ricibi tratamento medico. E momento aki, e trabou principal di Zr.Ms. Groningen ta pa enfoca riba transporta y entrega ayudo humanitario na e regionnan cu a wordo mas duramente afecta.