Matthew cu critica riba Corte: “Shannaia mester tin derecho na e abogado cu el a scoge”

ORANJESTAD – Eduardo Matthew dialuna den calidad como padrino, a expresa su preocupacion profundo durante un conferencia di prensa dialuna mainta tocante e situacion legal di Shannaia Fernandez Pedra, kende lo aparece den corte dia 3 di juli proximo pa enfrenta acusacionnan serio contra dje. Fernandez Pedra tabata e chauffeur cu a core cu su auto y alcansa dos peaton mortalmente dilanti Renaissance Hotel na comienso di e aña aki. For di e tempo ey, e persona en cuestion ta deteni na KIA. 

REPRESENTACION LEGAL 

Segun Matthew, e hoben ainda no tin representacion legal di su preferencia despues cu tanto Ministerio Publico como Corte a rechasa e peticion pa permiti e abogado Hulandes  renombra Yehudi Moszkowicz traha hunto cu abogado Boyce den su defensa. Matthew, kende tabata acompaña door di e mama y tio di Shannaia, a bisa cu e famia ta hopi preocupa pa e manera cu e proceso legal ta desaroyando. “Nos ta papia di un muhe hoben cu ta den detencion y cu ta enfrenta un caso hopi serio. Den un situacion asina, e mester por conta cu e defensa cu e mes tin confianza aden,” Matthew a declara.

FAMIA A SCOGE NAN PROPIO ABOGADO

Segun Matthew, Shannaia a solicita personalmente pa Boyce represent’e den corte. Sinembargo, Boyce a indica cu, paso cu e no ta practica derecho penal regularmente, e tabata dispuesto pa tuma e caso solamente si e por traha huntu cu abogado Hulandes Moszkowicz, kende si tin hopi experiencia den casonan penal grandi. Matthew a splica cu, conforme e reglamentonan vigente na Aruba, un abogado di Hulanda por representa un cliente solamente si e colabora cu un bufete local. Segun e, precisamente esei tabata e propuesta cu a wordo presenta na Corte. “Nos no ta compronde pakiko e colaboracion aki a wordo rechasa. E argumento cu e caso no ta suficientemente complica pa mester tin un abogado adicional, segun nos, no ta convincente,” el a bisa.

CRITICA RIBA E PROCESO

Matthew tambe a critica e manera cu e peticion a wordo trata door di corte. Segun e, e decision a tarda varios siman y finalmente a wordo anuncia apenas algun dia prome cu e audiencia. “E momento cu e decision a wordo tuma, ta lanta pregunta. Nos ta kere cu un persona cu ta enfrenta acusacionnan asina serio, mester haya oportunidad pa prepara un defensa completo,” Matthew a expresa.

TUR HENDE TIN DERECHO NA UN DEFENSA

Segun Matthew, aunke e audiencia lo sigui dilanti, Shannaia no por presenta sin e ekipo legal cu el a solicita. “E derecho di scoge bo propio abogado ta un principio fundamental. Nos ta preocupa cu esei no ta wordo respeta den e caso aki,” el a bisa. Matthew a enfatisa cu su declaracion no ta busca pa minimalisa e gravedad di e tragedia ni e dolor di e famia di e victimanan. “Tin masha empatia pa e famia cu a perde nan sernan keri. Pero na mesun momento, un persona cu ta involucra den un accidente tambe tin derecho humano y constitucional na un defensa honesto y profesional,” el a declara.

PREOCUPACION PA E CONDICION EMOCIONAL DI SHANNAIA

Matthew tambe a bisa cu, segun informacion cu e familia a ricibi di un psicologo, e estado emocional di Shannaia ta delicado y cu e detencion prolonga por agrava su situacion. Segun e, e psicologo a expresa preocupacion tocante e capacidad pa brinda tratamiento adecua den e circunstancianan actual.  “Nos ta spera cu e proceso sigui di un manera husto y cu tur derecho fundamental di e acusada wordo respeta,” Matthew a conclui.