Prome ekipo di asistencia humanitario di Aruba a yega Venezuela

CARACAS - E prome ekipo di asistencia humanitario di Aruba a yega Venezuela. E avion Dash-8 di Wardacosta a aterisa na Aeropuerto Internacional di Maiquetia cu e 11 boluntario cu lo participa den e prome fase di e mision humanitario. Na yegada e delegacion Arubiano a wordo ricibi pa representante di Embahada di Reino Hulandes na Caracas. Tambe representante di United Nations Office for the Coordination of Humanitarian Affairs (OCHA), e oficina di Nacionnan Uni cu ta coordina e respuesta humanitario durante emergencia y calamidad, tabata presente pa ricibi e ekipo y integra nan den e coordinacion internacional di e operacion. 

Despues di diferente dia di preparacion y coordinacion intensivo, e ekipo a cuminsa su mision cu e obhetivo di brinda cuido medico y apoyo na esnan afecta pa e temblor fuerte di diaranson ultimo. E prome grupo ta consisti di profesionalnan y boluntario cu tin experiencia den atende cu calamidad, incluyendo specialista di Crisis Management Office (CMO) y Cruz Cora Aruba. Den e prome fase, e ekipo lo evalua e situacion, instala e facilidadnan logistico necesario y brinda prome asistencia medico. E informacion cu nan lo reuni lo sirbi como base pa e siguiente ekipo medico cu Gobierno di Aruba ta preparando pa sali den e siguiente dianan. Durante e preparacion di e mision, Gobierno di Aruba a traha den coordinacion estrecho cu CMO, Cruz Cora Aruba, Embahada di Reino Hulandes na Caracas y diferente partner internacional pa garantisa cu e asistencia por yega rapidamente y di un forma efectivo.

Gobierno di Aruba ta confirma cu e yegada di e prome ekipo ta solamente e prome fase di e esfuerso pa brinda ayudo humanitario. Den e siguiente dianan, mas ayudo ta na caminda. Un siguiente ekipo medico y otro material di apoyo lo wordo movilisa segun e necesidadnan cu e prome ekipo ta identifica na Venezuela. Asina, Aruba ta sigui aporta den un forma coordina y efectivo na e esfuerso humanitario internacional.

Prome Minister Mike Eman a expresa su aprecio pa tur e profesionalnan y boluntario cu a acepta e reto di representa Aruba den un momento di necesidad grandi pa e pueblo Venezolano.

“Aruba tin un relacion historico y humano cu Venezuela. Den momento dificil manera esaki, ta nos deber di brinda apoyo unda cu nos por. Nos ta orguyoso di e profesionalnan y boluntario cu ta representa nos pais cu compromiso, humanidad y nivel halto di preparacion.”