Tin hopi posibilidad cu partido di Hulanda lo cuminsa cu retraso pa motibo di mal tempo

KANSAS CITY – Tin un posibilidad grandi cu e partido di Copa Mundial entre Hulanda y Tunez lo cuminsa cu retraso pa motibo di e mal tempo cu ta wordo pronostica pa Kansas City. Meteorologonan ta pronostica tormenta, yobida fuerte y biento duro, loke por haci cu e partido lo no cuminsa na tempo of cu mester wordo para temporalmente. E partido ta programa pa cuminsa pa 7or ora di Aruba.

PRONOSTICO

Segun e pronosticonan, for di cinco ora prome cu e partido cuminsa lo tin tormentanan aisla den region di Kansas City, acompaña pa yobida fuerte y rafaganan di biento. Un ora prome cu e partido, e tormenta por bira ainda mas fuerte. E mal tempo lo pasa solamente den mainta siguiente (ora local).

PROTOCOLONAN DI FIFA PA MAL TEMPO

Partidonan di Copa Mundial den Merca por sufri retrasonan largo, pasobra FIFA mester sigui e reglamentonan di seguridad local. Segun e protocolonan mericano, un partido mester wordo suspendi inmediatamente si detecta lamper den un radio di 13 kilometer rond di e stadion. E partido por reanuda solamente despues cu 30 minuut pasa sin cu tin un otro lamper detecta. Si durante e wardamento detecta un lamper nobo, e cuenta regresivo di 30 minuut ta cuminsa di nobo. Esaki por haci cu un retraso dura varios ora si e tormentanan ta sigui.

FIFA no tin un limite fiho di tempo pa cancela un partido definitivamente. Cada situacion lo wordo evalua individualmente, dependiendo di e circunstancianan y e condicionnan meteorologico. NOTA: E potret ta un dramatisacion y no un potret real, y ta sirbi solamente pa acompaña e relato.