Dos poderoso temblor a sacudi Venezuela y varios edificio a cay na Caracas

CARACAS – Venezuela a wordo sacudi diaranson atardi pa dos poderoso temblor cu a sigui otro den menos di un minuut, causando colapso di edificio, panico den capital Caracas y activacion temporal di un alerta di tsunami pa Aruba, Corsou y Boneiru.

Segun e Servicio Geologico di Merca (USGS), e prome temblor tabatin un magnitud di 7.2 y a ocuri na un profundidad di aproximadamente 22 kilometro. Solamente 39 seconde despues, un di dos a sigui cu un magnitud di 7.5 y un epicentro mas cerca di e pueblo di Yumare.

Miles di residente a core pafo di cas, edificio y oficinanan mientras cu e tera tabata move fuertemente. Testigonan a relata cu bentanan a kibra, murayanan a kraak y varios edificio a sufri daño severo. Filmacionnan comparti riba rednan social ta mustra edificio parcialmente colapsa y nubia di stof den diferente barrio di Caracas.

Minister di Interior, Diosdado Cabello, a confirma cu tin edificio cu a cay den Caracas y cu e situacion ta specialmente serio den e bario Los Palos Grandes y Altamira. Segun e, e temblor tambe a wordo sinti fuertemente den Trujillo, Yaracuy, Carabobo, Aragua, Miranda y La Guaira.

Despues di e dos temblornan, Centro di Alerta di Tsunami di Merca a emiti un alerta pa costa di Venezuela y pa islanan manera Aruba, Corsou y Boneiru. Poco tempo despues, e alerta a wordo cancela ora evaluacionnan a indica cu no tabatin mas peligro inmediato di un tsunami.

Na Colombia, residente di Bogota tambe a reporta cu nan a sinti e movimiento di tera, mientras cu autoridadnan a evacua algun edificio como medida preventivo.

Te momento di publicacion, autoridadnan di emergencia tabata sigui busca personanan den e areanan mas afecta y evaluando e magnitud di e dañonan. Gobierno venezolano a bisa cu ainda no tin un cifra oficial di herido ni morto, pero tin preocupacion cu e numero di victimanan por subi conforme e operacionnan di rescate ta sigui.

Autoridadnan ta pidi poblacion pa no drenta edificio cu por tabata compromete y pa keda alerta pa posible replica den e siguiente oranan.