Surinam Airlines ta stop cu vuelo directo entre Corsou y Miami

WILLEMSTAD – Surinam Airlines a confirma cu a partir di e ultimo siman di juni 2026, e compania lo stop cu su servicio entre Corsou y Miami. E informacion a wordo publica dia 23 di juni pa AeroRoutes. Te cu recientemente, Surinam Airlines tabata opera tres vuelo pa siman usando avion Boeing 737-800 riba e ruta Paramaribo – Aruba – Corsou – Miami. Sinembargo, e servicio entre Corsou y Miami a wordo elimina oficialmente for di e horario di vuelo di e compania. Segun e publicacion, e ruta tabata wordo opera regularmente te cu dia 1 di mei 2026. Despues di esey, tabatin solamente algun vuelo programa riba 22 di mei, 12 di juni, 17 di juni y 22 di juni 2026. Cu e cambio nobo, Surinam Airlines lo concentra su servicio pa Miami riba e ruta Paramaribo – Georgetown – Miami. E compania ta informa cu e conexion pa Miami awor lo pasa via Georgetown, capital di Guyana.

ARUBA Y CORSOU TA KEDA CONECTA CU PARAMARIBO

Mientrastanto, Aruba y Corsou lo sigui forma parti di e red di vuelo di Surinam Airlines, pero sin e extension pa Miami. E ruta nobo lo opera como Paramaribo – Aruba – Corsou – Paramaribo, cu tres vuelo pa siman usando e mesun avion Boeing 737-800. E decision ta representa un cambio importante pa pasaheronan cu tabata uza e conexion directo entre Corsou y Miami. Awor, esnan cu kier bay Miami cu Surinam Airlines lo mester haci e trayecto via Georgetown. Aun no a wordo anuncia oficialmente e motibonan exacto tras di e decision pa termina cu e ruta Corsou-Miami, pero e movimiento ta forma parti di un reorganisacion mas amplio di e red di destino nan di e aerolinea.

Pa pasaheronan di Aruba y Corsou, e noticia ta significa cu un opcion directo pa Miami ta desaparece, mientras cu Surinam Airlines ta enfoca su operacionnan riba ruta nan cu e compania ta considera mas eficiente y rentable.