Corsou por enfrenta Francia, Noruega of hasta Merca si nan logra clasifica pa siguiente ronda

PHILADELPHIA - Cu un solo partido ainda pa hunga den Grupo E di Mundial FIFA 2026, e soñonan di Corsou ta mas bibo cu nunca. Despues di un empate historico 0-0 contra Ecuador, e seleccion caribeño a pone su mes den posicion pa pelea pa un luga den Ronda di 32.

Actualmente, Corsou ta ocupa un di cuarto puesto den grupo cu un punto, pero tur cos por cambia diahuebs ora nan enfrenta Costa di Marfil, mientras Alemania ta hunga contra Ecuador na mesun momento.

E partido entre Corsou y Costa di Marfil ta bira un berdadero final adelanta. Un victoria lo pone Corsou cu cuater punto y habri porta pa diferente  scenario cu por resulta den clasificacion directo of como uno di e mihor ekiponan cu a termina na di tres puesto.

Si Corsou logra termina na di dos puesto den Grupo E, nan lo enfrenta e ekipo cu termina di dos den Grupo I. Basa riba e posicionnan actual, esaki por ta entre Francia of Noruega, dos potencia di futbol cu a mustra nan forza durante e torneo.

Si Corsou clasifica como uno di e mihor ekiponan cu a termina na di tres puesto, e caminda por bira ainda mas dificil. Den e caso ey, nan por topa cu ganador di un grupo importante. Entre e posibilidadnan tin Merca, Mexico, Inglaterra of otro ganador di grupo cu lo wordo defini den e ultimo dianan di fase di grupo.

Pa e momento aki, nada ainda no ta defini. Tur loke lo pasa ta depende di resultado entre Corsou y Costa di Marfil, y tambe di loke ta sucede entre Ecuador y Alemania.

Sin embargo, un cos ta cla: Corsou a logra mantene su  speranza bibo y a pone mundo di futbol den expectativa. Cu un victoria diahuebs, e seleccion lo por sigui escribi historia y acerca un paso mas na un logro cu poco hende tabata imagina promé cu Mundial a cuminsa.

Posibel rivalnan di Corsou si nan clasifica:

Francia, Noruega, Merca, Mexico, Inglaterra

Otro ganador di grupo segun e cuadro final di clasificacion

Pa awor, tur mirada ta riba Philadelphia, unda Corsou tin oportunidad di sigui sorprendiendo mundo henter. Si nan perde mayan sinembargo, nan ta elimina. Pero, ban wak mayan!