OM y Reclassering cu programa piloto cu enkelband pa hobennan sospechoso

ORANJESTAD – Ministerio Publico (OM) y Stichting Reclassering en Jeugdbescherming Aruba (SRJA) a firma un acuerdo pa cuminsa un proyecto piloto cu vigilancia electronico, conoci popularmente como “enkelband”, pa hobennan entre 12 y 23 aña di edad.

E programa, cu lo drenta na vigor dia 1 di juli, ta permiti cu cierto sospechosonan hoben keda den libertad durante suspension di detencion preventivo, mientras cu nan ta wordo controla electronicamente y supervisa pa Reclassering.

Segun e acuerdo, solamente hobennan cu ta cualifica pa suspension di detencion preventivo y cu ricibi un conseho positivo di Reclassering lo por entra den e programa. Riba peticion di Ministerio Publico, hues por impone e enkelband como condicion pa e suspension.

Meta principal di e piloto ta pa reduci e impacto negativo cu detencion por tin riba hobennan, permitiendo nan sigui cu scol, trabao of guia profesional, mientras cu autoridadnan ta controla si nan ta cumpli cu e condicionnan impone.

Reclassering lo monitorea cumplimiento di e condicionnan y informa Ministerio Publico inmediatamente si tin infraccion. Den caso di incumplimento, OM por pidi hues pa revoca e suspension y termina e vigilancia electronico.

Durante e periodo di supervision, e hoben mester permanece na su domicilio, salvo excepcionnan aproba previamente pa actividadnan manera scol, trabao of tratamiento. Tambe por tin condicionnan adicional, manera prohibicion di contacto cu ciertu personanan, obligacion di presenta regularmente na Reclassering of participa den tratamiento especialisa.

E proyecto piloto lo wordo evalua dia 1 di februari 2027 pa determina si e sistema por wordo implementa na un escala mas amplio