Beyond Sport Limit Foundation lo core marathon riba tur tres isla ABC den tres dia

ORANJESTAD – Beyond Sport Limit Foundation, cu apoyo di MetaCorp, lo organiza un reto unico cu nunca antes a wordo realiza riba e islanan ABC. Bou di e lema “Beyond Sport Limit Foundation & MetaCorp Making a Difference”, e fundacion lo core un marathon completo riba Boneiro, Corsou y Aruba den tres dia consecutivo.

E reto lo cuminsa dia 26 di juni na Boneiro cu un distancia di 42 kilometer, sigui dia 27 di juni na Corsou cu un otro marathon di 42 kilometer. E aventura lo conclui dia 28 di juni na Aruba durante e evento MetaFit Walk & Run 2026, unda e ultimo 42 kilometer lo wordo completa.

E iniciativa tin un fuerte enfoke riba inclusion. Durante e recorrido na Boneiro y Corsou, atleta cu necesidadnan special lo participa den stoel adapta, acompaña pa voluntarionan di e fundacion. Na Aruba, cinco atleta special lo forma parti di e tramo final di e marathon.

Segun e organisacion, esaki ta e prome biaha cu un reto di e magnitud aki ta wordo realiza consecutivamente riba tur tres isla den solamente tres dia.

Beyond Sport Limit Foundation ta utiliza un sistema di acompañamento unda cada atleta special ta wordo asisti pa un “buddy”, garantisando seguridad y permitiendo cu tur participante por disfruta plenamente di e experiencia.

E fundacion a wordo funda na 2022 cu e meta di brinda personanan cu limitacionnan fisico of mental e oportunidad pa participa activamente den deporte y recreacion. Actualmente, e organizacion ta conta cu 44 atleta special, 13 voluntario, varios stoel adapta, bicicleta special y kayak adapta.

MetaCorp, cu ta sostene e iniciativa desde su fundacion, ta considera e proyecto como parti di su compromiso social y comunitario, promoviendo bienestar, inclusion y oportunidad pa tur miembro di comunidad.

E marathon ta representa no solamente un reto deportivo, pero tambe un mensaje poderoso cu deporte no tin limite y cu tur persona merece e oportunidad pa sigui su pasion y realiza su soñonan.