Pausa pa bebe awa na Mundial ta duna entrenador mas influencia durante partido

NEW YORK - E pausa obligatorio pa bebe awa cu FIFA a introduci durante Mundial 2026 pa proteha hungadornan contra calor extremo, ta causando un debate den mundo di futbol. Loke tabata wordo pensa como un medida pa salud, awor tambe ta wordo considera como un herment tactico pa entrenadornan. Asina un columna den e portal hulandes NOS ta bisa. 

Durante e pausa, entrenadornan ta haya oportunidad pa duna instruccionnan adicional na nan ekipo y haci ahustenan tactico durante cada mitad di partido. Un ehempel tabata e partido entre Hulanda y Suecia, unda entrenador Sueco Graham Potter a cambia su planteamento durante e pausa, algo cu a crea problema pa e Hulandesnan.

Analista di futbol Kenneth Perez ta bisa cu e pausanan ta aumenta e influencia di entrenadornan durante partido. Segun e, esaki ta representa un “estilo nobo di entrenadornan”, pasobra nan awor tin mas momento pa interveni den e desaroyo di un encuentro.

No tur hende ta di acuerdo cu e cambio. Entrenador di basket Marco van den Berg ta critica e medida, argumentando cu futbol tradicionalmente ta unico pasobra entrenadornan solamente por haci cambionan grandi durante descanso. Segun e, mas intervencion for di banda por kita algo di spontaneidad y autenticidad for di e deporte.

Entrenador di Inglaterra, Thomas Tuchel, tambe a expresa preocupacion. Segun e, e pausa nan ta casi dividi un partido di futbol den cuatro cuarto, similar na basket, cambiando e caracter tradicional di e deporte.

A pesar di e critica, hopi persona ta reconoce cu si calor extremo ta pone salud di hungadornan na riesgo, FIFA tin obligacion di tuma medidanan pa proteha nan. E debate awor ta centra riba si e bentaha pa salud ta mas importante cu e impacto cu e pausa nan por tin riba esencia tradicional di futbol.