PPA na AVP y FUTURO: No goberna via Facebook sino cu mas dialogo

ORANJESTAD –   Lider di fraccion di PPA, Eduard Pieters, ta critica e manera cu reciente comunicacionnan politico a wordo maneha door AVP y FUTURO, señalando cu decisionnan importante pa e pais no mester wordo comunica principalmente via Facebook.

Pieters a expresa preocupacion tocante e anuncio di retiro di Prome Minister Mike Eman y e reaccion posterior di lidernan di coalicion via rednan social. Segun dje, e situacion a crea duda y incertidumbre den opinion publico.

E parlamentario ta insisti cu Aruba mester mas dialogo, mas comunicacion y mas claridad tocante e futuro liderazgo di e pais. Segun Pieters, decisionnan cu ta afecta Aruba mester wordo discuti abiertamente den Parlamento y den consulta cu e comunidad.

“Un pais no por wordo goberna via Facebook. Comunicacion, coordinacion y liderazgo ta esencial pa mantene confianza y estabilidad,” Pieters a declara.