Parlamento lo trata prome Fondo di Inversion di Aruba otro siman

ORANJESTAD – Gobierno AVP-FUTURO lo presenta y defende riba 23 di juni den Parlamento e ley pa crea e prome Fondo General di Inversion y Desaroyo (AIOF) di Pais Aruba. Segun Minister di Finansa Geoffrey Wever, e fondo ta un compromiso importante di e actual gobierno y tin como meta financia proyecto strategico cu ta contribui na crecimiento economico y bienestar di Aruba a largo plazo. Prome cu e tratamiento den Parlamento, gobierno a contesta 229 pregunta presenta door di parlamentarioonan tocante e fondo.

LO INVERTI DEN AREANAN IMPORTANTE

E AIOF lo enfoca riba inversionnan den areanan importante manera enseñanza, innovacion, energia renovabel, resiliencia climatico, gobierno digital, vivienda duradero, infrastructura y desaroyo di  sectornan economico nobo  manera agricultura comercial, FINTECH, industria creativo y economia blauw.

RECURSO PUBLICO

Gobierno ta propone pa financia e fondo principalmente cu recurso publico aproba door di Parlamento, pero e structura legal tambe lo facilita pa atrae aportacion financiero for di entre otro Hulanda y Union Europeo. Segun Wever, e fondo lo crea un mecanismo permanente pa facilita inversionnan strategico cu ta beneficia Aruba tanto na corto como largo plazo. E reunion publico den Parlamento tocante e ley ta programa pa 23 di juni.