Proyecto internacional lo revela secreto di naturalesa di Aruba, Boneiro y Corsou

ORANJESTAD - Investigadonan di Aruba, Boneiro, Corsou y Hulanda a cuminsa un proyecto grandi pa studia y documenta mihor e biodiversidad di e islanan ABC. E iniciativa, yamá ABC Natural History Collections (ABC-NHC), ta combina coleccion historico di mas cu 200 aña cu tecnologia moderno manera reconocemento di imagen y DNA barcoding pa identifica especienan nobo y mihora conocemento tocante flora y fauna local.

Segun e investigadonan, ainda no tin lista completo di hopi grupo di animalnan, manera sprikhaan, bij y tor, y ta probable cu tin ainda especienan desconoci riba e islanan. E proyecto lo digitalisa miles di muestra natural cu ta warda den coleccionnan di Naturalis na Hulanda y lo usa esakinan pa compara con e situacion actual di naturalesa.

Universidad di Aruba, Universidad di Corsou, Naturalis, Universiteit Leiden, Aruba Conservation Foundation, Stinapa y Carmabi ta colaborando den e investigacion. Studiantenan local lo ricibi entrenamiento den tecnologia moderno y e proyecto lo culmina cu publicacion di un buki nobo: The Biodiversity of the ABC Islands.

Investigadonan ta spera cu e proyecto lo yuda descubre especienan nobo, crea guia practico pa naturalesa y duna un mihor bista di con biodiversidad di Aruba, Boneiro y Corsou a cambia durante e ultimo siglo.